Մ6-Սարահարթ-Սանահին-Ակներ ավտոճանապահի հիմնանորոգումն իրականացնող ընկերության աշխղեկներից մեկը ցույց է տալիս վերոնշյալ ճանապարհի վերջին ժայռոտ հատվածն ու հիշեցնում. շինարարության ավարտն արդեն երևում է:
Սանահին-Ակներ մոտ հինգ կիլոմետր երկարությամբ ճանապարհի վերջնամասում, «Լեոպոլդ և ընկերներ» ընկերության աշխատակիցներն իրականացնում են պայթեցման նախապատրաստական աշխատանքներ:
«Կոնկրետ այս հատվածում կատարվում է պայթեցման նախապատրաստման աշխատանքներ: Աշխատանքները կատարվում են մաքսիմալ արագությամբ»,- ասում է աշխղեկը:
Ճանապարհին ընթանում են նաև հողային աշխատանքներ: Իսկ մոտ մեկ կիլոմետր հատվածում արդեն տեղադրվել է ասֆալտի առաջին շերտը: Աշխղեկ Յուրա Թամազյանի խոսքով՝ ավտոճանապարհն ունենալու է 10 մետր լայնություն, որից 6 մետր և 20 սանտիմետրն՝ ասֆալտապատ:
«Մաքսիմալ փորձում ենք չխոչընդոտել բնակչության տեղաշարժին, լինում են ժամանակավոր դադարներ, այսինքն՝ ճանապարհը փակվում է, բայց փորձում ենք մաքսիմալ արագությամբ բացել»,- ասում է աշխղեկը:
Շինարարությունը չի սահմանափակվի միայն ճանապարհի հիմնանորոգմամբ: Այստեղ կկառուցվեն նաև ջրահեռացման համակարգեր, հենապատեր:
Իրողությունը իսկապես ոգևորել է հատկապես Ակներ գյուղի բնակիչներին: Ասում են՝ ճանապարհը տասնամյակներ շարունակ անանցանելի է եղել, գյուղից քաղաք հասնելը՝ մեծ դժվարություն: Կարծում են՝ ճանապարհի հիմնանորոգումը կնպաստի նաև գյուղում զբոսաշրջության զարգացմանը:
«Շատ լավ էլ աշխատում են մարդիկ»,-նշում է վարորդներից մեկը:
Մ6-Սարահարթ-Սանահին-Ակներ հիմնանորոգվող ճանապարհի նախագծանախահաշվային արժեքը երկու մլրդ դրամ է։ Նախագծի արդյունքում ճանապարհն ամբողջությամբ կասֆալտապատվի, կկահավորվի ճանապարհային համապատասխան նշաններով ու գծանշումներով: Նախագծի ավարտը նախատեսվում է մինչև տարեվերջ:
