Month: Հունվարի 2020

Ալավերդու նորաբաց «Կոտտոնի» կարի արտադրամասը փետրվարից կվերսկսի աշխատանքը: Արտադրամասում առաջիկա օրերին աշխատանքային պայմանագրեր կկնքվեն աշախատակիցների հետ, ինչը նախկինում չի արվել: Բացի այդ, փաստաթղթերի ներքին ստուգումներ են իրականացվում: Հիշեցնենք, որ դեռևս նախորդ տարեվերջին աշխատակիցները բողոքի ակցիա էին կազմակերպել՝ ընկերության համասեփականատեր Կարեն Դասոյանից պահանջելով իրենց աշխատավարձը: Միայն դեկտեմբերի 30-ին Դասոյանը վճարել էր նրանց՝ սահմանված աշխատավարձի 65 տոկոսի չափով, ինչը չէր բավարարել աշխատողներին, բայց աղմուկ չէին բարձրացրել: Արտադրամասի աշխատանքների մեկնարկից սկսած աշխատակիցները կվարձատրվեն գործարքային հիմունքներով:

Ձմռան ամիսներին տեղումների բացակայությունն առողջական բազմաթիվ խնդիրների պատճառ է դառնում: Մարդիկ հիվանդանոց են դիմում ինքնազգացողության վատացմամբ ու օրգանիզմում այլ բացասական երևույթներով պայմանավորված: Ալավերդու բժշկական կենտրոնի մասնագետներն ասում են, որ խնդրով պայմանավորված հիվանդների նման հոսք երբևէ չեն ունեցել:

Հունվարի 14-ին Ալավերդու համայնքապետարանում պարգևատրման արարողություն էր: Ավանդույթի համաձայն շնորհակալագրեր հանձնվեցին մարզաշխարհի ներկայացուցիչներին ու նաև այն մարդկանց, ովքեր նախորդ տարի հաջողություններ են ունեցել իրենց աշխատանքում:

Արդեն 25 տարի Հագվի գյուղը մանկապարտեզ չունի: 1995-ին գյուղի 2 խմբանի մանկապարտեզը փակվել է, որովհետև գյուղապետարանի սուղ բյուջեով չեն կարողացել հոգալ մանկապարտեզի պահպանության ծախսերը: Այսօր 20 մանկահասակ փոքրիկների ծնողներ սպասում են, թե երբ  գյուղում վերջապես մանկապարտեզ կբացվի: Իսկ Հագվիի վարչական ղեկավարը հույս ունի, որ դպրոցի շենքի վերակառուցումից հետո այնտեղ նախակրթարան կբացվի:

Երևանում Ա H1N1 գրիպից մահացության դեպքով պայմանավորված Ալավերդիում խուճապ չկա: Մասնագետները, սակայն, հորդորում են այս հիվանդությանը լուրջ վերաբերվել: Նախ գրիպով հիվանդին պետք է մեկուսացնել: Բացի այդ, կարևոր է նաև պատվաստումը: Հիմնականում  խոցելի խմբերին՝ մինչև 5 տարեկլան երեխաներին ու 65 տարեկանից բարձրերին, ինչպես նաև հղիներին կանխարգելիչ պատվաստումներ պետք է արվեն:

Ալավերդու համար 4 նախադպրոցական ուսումնական հաստատության երկարամյա տնօրեն Լաուրա Ավագյանն անցել է վաստակած հանգստի: Նախադպրոցական կրթության ոլորտում նա աշխատել է 4 տասնամյակից ավելի: 2019 թվականի դեկտեմբերի 30-ին ավարտվել է Լաուրա Ավագյանիպայմանագրի ժամկետը, իսկ այս մանկապարտեզում տնօրեն աշխատելու համար համայնքապետարան դիմում է ներկայացրել 8 քաղաքացի:

Ալավերդու Վիքիակումբում շնորհակալության օրվան նվիրված պրեզենտացիա էր կազմակերպել ակումբի համակարգող Նարինե Մուրադյանը։ Մասնագիտությամբ հոգեբան Նարինեն ակումբականներին պատմեց, թե հոգեբանական ինչ ազդեցություն կարող է ունենալ «շնորհակալություն» բառը։

Հունվարի 11-ը շնորհակալություն ասելու միջազգային օրն է: Հոգեբանների կարծիքով՝ երախտիքի խոսքերը շոյում և ուրախություն են պարգևում մարդկանց, նույնիսկ  ի վիճակի են հանգստացնելու: «Անկյուն գումարած 3» ՀԸ նկարահանող խումբը հարցումներ է արել՝ պարզելու, թե ու՞մ են շնորհակալ ալավերդցիները։

Կոյուղու վթարները հիմնականում բնակիչների անբարեխիղճ վերաբերմունքի արդյունք են. այս կարծիքին են «Վեոլիա ջուր» ընկերության Ալավերդի տեղամասի աշխատակիցները: Լինում են դեպքեր, երբ նույն տեղում մի քանի անգամ վթարավերականգնման աշխատանք են անում: Իսկ կոյուղատարների վթարներ Ալավերդիում հաճախ են լինում:

Ալավերդի քաղաքում բնակֆոնդի  կառավարումն իրականացվում է բնակշահագործման տեղամասերի միջոցով: Բնակշահագործման տեղամասը  շահույթ հետապնդող կազմակերպություն է, որը 5 տոկոս հարկ է վճարում պետությանը: Բայց Ալավերդու բնակշահագործման երկու տեղամասերի  գործունեության պայմաններում շահույթի մասին խոսելն ավելորդ է, որովհետև վարձավճարների հավաքագրումը լիարժեք չի կատարվում: Գումարած դրան՝ բնակիչների տարիներով կուտակված պարտքերը միլիոնի են հասնում: Բնակիչներն էլ իրենց հերթին տեղամասերին են մեղադրում՝ առաջարկվող ծառայությունները լիարժեք չմատուցելու համար: