Month: Հուլիսի 2019

Այսօր առավոտյան՝ ժամը 04:00 -ի սահմաններում, «Հարավկովկասյան երկաթուղիներ» ընկերության Լոռու մարզի Թումանյան կայարանում խոշոր հրդեհ է բռնկվել. շրջվել է վառելիք տեղափոխող 8 բեռնատար վագոն, որոնց մի մասում բենզին է եղել: Հրդեհը մարելու նպատակով դեպքի վայրում աշխատել է ԱԻՆ Լոռու մարզային փրկարարական վարչության 9 մարտական հաշվարկ: Բարեբախտաբար զոհեր չեն եղել: Դեպքի մանրամասները՝ շուտով:

Ալավերդու Օլեգ Գորբունովի անվան մարզադպրոցն այսօր համալրվեց նոր՝ ըմբշամարտի պարապմունքների համար անհրաժեշտ մարզագույքով: Գույքը դպրոցին անհատներ են նվիրաբերել: Իսկ սեպտեմբերից դպրոցում ըմբշամարտի պարապմունքներ կանցկացվեն: 

Հայաստանում Չեխիայի դեսպանատունն իրականացնում է «Ակտիվ քաղաքացիները շրջակա միջավայրի պաշտպանության և զարգացման գրավական» ծրագիրը: Այս ծրագրի շրջանակում Ալավերդու «Համայնքային համախմբման և զարգացման կենտրոն» ՀԿ-ում Էկո դպրոց է գործում, որտեղ ընդգրկված են շրջակա միջավայրի պահպանությամբ մտահոգ ակտիվ երիտասարդներ:

Մ6 միջպետական ճանապարհի՝ Արճիս բնակավայրին հարակից հատվածում Հայաստանի անուշահամ մրգերն են վաճառում շրջակա գյուղերի բնակիչները: Մրգերի կողքով անտարբեր չեն անցնում հատկապես զբոսաշրջիկները: Այս տարի, սակայն, մրգի տեսքը այն չէ,-ասում են վաճառողները: Կարկուտի հետևանքով որակազրկված բերքը մատչելի գնով էլ դժվար են վաճառում:

Ալավերդու նախադպրոցական ուսումնական հաստատություններում ընդունելության շրջան է: Բայց կան մանկապարտեզներ, որտեղ տարբեր տարիքի երեխաների ընդունելու հնարավորություն չունեն: Քաղաքի համար 3 մանկապարտեզն, օրինակ, մեկ խառը խմբով է աշխատում, ընդունում են միայն նախադպրոցական տարիքի՝ 5-6 տարեկան երեխաների: Իսկ ավելի փոքրերը պետք է սպասեն: Մանկապարտեզում կան բոլոր անհրաժեշտ պայմանները՝ նոր խումբ բացելու համար: Համայնքապետարանը, սակայն, դաստիարակի և դայակի՝ նոր հաստիքների  համար չի կարող ֆինանսավորել:

Հուլիսի 21-ին Ալավերդիում կնշվի Քաղաքի օր տոնը: Տաս տարուց ավելի քաղաքի օրը նշվել է հանքագործի և մետալուրգի մասնագիտական օրվա հետ՝ նշանավորելով Ալավերդու արդյունաբերական անցյալն ու ներկան: Այս տարի, սակայն, հաշվի առնելով մետալուրգիական գործարանի աշխատանքի դադարը՝ տոնը մեծ շուքով ու հանդիսավորությամբ չի նշվի: Իսկ համայնքապետարանում խոստանում են քաղաքի մշակութային խմբերի մասնակցությամբ տոնական տրամադրություն ապահովել:

Հուլիսի 13-ի կարկտահարության հետևանքով մեծ վնասներ են կրել հացահատիկի արտերը: Գյուղացիները լավ բերք ստանալու ակնկալիք չունեն: Մեծ գումարներ  են ծախսել, ցանքսի, բույսի բուժման, սերմացուցի ձեռքբերման և ընդհնարապես մշակության համար, սակայն բերքի քանակը ոչ բոլոր դեպքերում է փակում կատարված ծախսը:

Ալավերդու ներհամայնքային ճանապարհներին քարաթափման վտանգը մեծանում է հատկապես անձրևներից հետո: Համայնքի աշխարհագրական դիրքն ու ռելիեֆը հաշվի առնելով՝ նախորդ տարի, օրինակ, համայնքապետարանի և ԱԻՆ-ի համագործակցության արդյունքում արհեստական քարաթափում  իրականացվեց Սանահին-Սարահարթ թաղամաս տանող ճանապարհին: Մասնագետներն ասում են, որ լեռնային բնակավայրերում ամեն տարի նման աշխատանքներ անելու անհրաժեշտություն կա:

Ալավերդիում շենքերի տանիքների նորոգման ծրագիր կիրականացվի: Այս մասին ասել էր Լոռու մարզպետը՝ Ալավերդու համայնքապետարանում հուլիսի 9-ին կայացած հանդիպման ժամանակ: Այս կերպ մարզպետարանը փորձում է հավասարակշռել կառավարության սուբվենցիոն ծրագրերին Ալավերդու համայնքապետարանի մասնակցության բացը: