Հեղինակ՝ Մանանա Վարոսյան
Օպերատոր՝ Գևորգ Քոչինյան
Վերանորոգված, բայց վերանորոգման կարիք ունեցող կրթական հաստատությունը Ուռուտի միջնակարգ դպրոցն է՝ 147 աշակերտով։ Երկհարկանի շենքը 15 տարի առաջ է հիմնանորոգվել։ Այսօր պատկերը սա է՝ խոնավությունը հիմքերից վերև է բարձրանում, քայքայում ներկն ու ծեփը: Տանիքից ևս ջրի հոսք կա, ինչի հետևանքը շարքից դուրս եկող լուսամուտներն ու հատակն են: Կոտրվել է լուսամուտագոգերի զգալի մասն ու եթե այսպես շարունակվի, կհայտնվենք հին տաշտակի առջև, ասում է հաստատության տնօրենը:
Անուշ Օհանյանը
«Երկար տարիներ՝ արդեն 15 տարի ավել, հիմնանորոգումից հետո ունի կոսմետիկ նորոգման անհրաժեշտություն։ Տեղ կա, որ թափանցում են անձրևաջրերը։ Ունենք կոսմետիկ խնդիրներ», – ասում է Ոռուտի միջնակարգ դպրոցի տնօրեն Անուշ Օհանյանը։
Կրթական հաստատությունում սա միակ խնդիրը չէ, գյուղը տարածաշրջանի ամենամեծ բնակավայրերից է, սակայն ինչպես շատ ու շատ բնակավայրերում, այստեղ էլ նկատվում է աշակերտների թվի զգալի նվազում։ Նախկին 20 աշակերտ ունեցող դասարաններն այսօր լավագույն դեպքում 8 աշակերտ ունեն:
«Ցավոք սրտի, աշակերտների թվաքանակի նվազում է նկատվում։ Կենցաղային պայմաններից, թե․․․ չգիտեմ։ Դե, գյուղ է՝ իր հոգսերով», – ասում է տնօրենը։
Կա ևս մեկ մտահոգություն՝ նոր ուսումնական տարվանից դպրոցը կունենա նաև մասնագետների խնդիր: Միջին մասնագիտական կրթություն ունեցող, գրեթե 30 տարի աշխանքային փորձով, հարյուրավոր երեխաներ կիթած ու դաստիարակած ուսուցիչները նոր օրենքի պահանջով այլևս չեն կարող աշխատել դպրոցում: Երկու մասնագետներն էլ արդեն ծանուցվել են: Սա բարոյական նորմերի խախտում և որակյալ մանսագետների ջարդ է որակում դպրոցի ուսումնական գծով մասնագետը:
Անահիտ Զաքարյանը
«Կարծեք թե այսօրվա համար ամենացավոտ խնդիրներից մեկը դա է։ Որքան էլ որ լավ փոփոխություններ են իրականացնում կրթական համակարգում, այսօր ներկայացնում ենք կտրուկ շրջադարձ։ Իմ կարծիքով փոփոխությունը, համալրումը պետք է լինի աստիճանական կարգով։ Ուսուցիչն այսօր ճգնավորի դերում է», – նշում է Ուռուտի դպրոցի ուսմասվար Անահիտ Զաքարյանը։
Օրենքի կիրառման դեպքում գյուղական փոքր բնակավայրերը, որոնք առանց այդ էլ ուսուցիչների պակաս ունեն, առավել մեծ խնդիրների են բախվելու: Եվ ովքե՞ր են փոխարինելու երկարամյա փորձով, թեկուզև բարձրագույն կրթություն չունեցող ուսուցիչներին և արդյո՞ք բարձրագույն կրթությամբ նոր շրջանավարտներն ավելի լավ կարող են աշխատել, թերևս երկմտում է ուսումնական գծով մասնագետը:
«Այստեղ ավելի շատ դպրոցն ինքն է կրթում, քան այն կրթության վկայականը, որը բերում է համալսարաններից։ Դպրոցում ուսուցիչը սովորում է ավագ սերնդից, կարծեք էստաֆետ ստանում է աշխատանքի այն ձևը, այն հմտությունը, որը դրել է դպրոցը», – նշում է ուսմասվարը։
Այնուամենայնիվ, Ոռուտի միջնակարգ դպրոցում դասապրոցեսն առայժմ չի տուժում։ Իմ զրուցակիցները հույս ունեն, որ վերին օղակներում հաշվի կառնեն խնդիրները, իսկ իրենք օրենքում փոփուխություն կտեսնեն:
Մինչ այդ, աշակերտների ցանկությունը ոչ միայն բարեկարգված կրթական հաստատություն, այլ նաև կանաչ միջավայր, այսինքն՝ այգի ունենալն է:
«Կուզեմ ծառեր տնկենք, գեղեցկացնենք դպրոցի բակը», – ասում է Ուռուտի միջնակարգ դպրոցի աշակերտ Դավիթ Ասատրյանը;
Ըստ իմ զրուցակիցների՝ այգին հնարավորություն կտա երեխա-բնություն կապի ամրապնդամանը։
